今日十七樓嚟咗2位老朋友 , 這兩位老朋友 , 確確實實係2位年紀老邁既兩位老人家 ...

今日晏晝 , 豬生出咗去尖咀拎份驗身執告 , 返到嚟 , 我問佢醫生點講 , 佢話個醫生話未見個有人會咁健康喎 ! 我覺得佢好似吹水咁 , 一個又夜瞓 , 又食煙 , 又大肚腩既人又會有幾咁健康 , 不過雖然係咁 , 但我仍希望 , 佢唔係吹水啦 ~

3點幾鍾時 , 佢落去元朗車我 , 再返屋企接埋老豆去屯門買雪褸 , 老豆尋晚發完一倫脾氣之後 , 今朝約咗阿Ling 佢地去上水飲茶 , 我知道阿LING 同阿KEN 做咗場戲既 , 目的都係想老豆去 . 就係咁 , 老豆就乖乖地咁跟我地去買雪褸喇 !

我地一揀 , 就揀咗成2個鍾頭 , 好在老豆冇發脾氣咋 ! 原本我地打算買5件 , 咁就可以一人一件 , 但 ... 真係好鬼貴 , 咁啱 , 豬生同佢老豆 , 我同奶奶既身型都好似 , 所以 , 我地諗倒最經濟既方法 , 就係買2件 , 但4份著 , 好在佢地17號去 , 25號返 , 咁重趕得切轉比我地著 , 唔係都好大獲 , 哈 ~ 菲比豬重攪笑 , 因為佢實在太肥喇 ! 所以要買件女裝大碼 , 哈哈 ~ 不過都好既 , 買大少少 , 下次再去落雪既地方 , 都唔駛再買過丫嘛 ! HEHE ~

到夜晚 ----> 

早陣子 , 奶奶去咗澳洲旅行3個星期 , 當時 , 佢喺團入面認識咗2位來自美國同加拿大既越南華僑 , 分別係Auntie Chu 同埋 Auntie Lee ...

最近佢地兩位嚟咗香港 , 順便去台灣 , 大陸玩吓 , 今日 , 呢兩位婆婆就嚟咗作客 , 今晚喺樹食飯同借宿一霄喇 !

老豆佢哽係唔鍾意喇 ! 2日前佢就經已喺樹鬧 , 話我奶奶好請人返嚟屋企瞓 , 又話只係見過人地一兩次 , 就請人地入屋 , 一陣又呢樣 , 一陣又果樣 , 總之就鬧鬧鬧 , 不停咁鬧啦 ! hay ~ 我都慣咗lu , 我知道 , 我呢個老爺好得意 , 只要你乖乖地咁聽佢鬧 , 間中又和應吓佢 , 佢就好快就轉topic 架喇 ! 哈哈哈 ~

呢2位Aunite 的確同媽咪好有緣 , 地球上有咁多人 , 可以認識倒已經唔簡單 , 重要去到咁遠都識倒 , 就更加難得啦 ! 佢地好Nice , 表面睇好似一個平平無奇既老人家 , 但佢地好有修養 , 而且好健談 , 能夠喺佢地身上聽倒咁多歷史 , 今餐飯真係得益唔少 !

唔知係咪男人同女人既分別 , 我家3個豬男 , 佢地好似對呢2位貴賓冇咩好感 , 或者係因為 , 佢地都唔信 , 呢個世界會有好人啦 !

頭先有個小插曲 , 話說其中一位Auntie 沖涼 , 沖沖吓 , 我老爺既閂燈引又發作 , 佢都唔係第一次架喇 ! 每次當佢行過洗手間門口 , 佢都唔會叩吓門睇吓有冇人 , 就會跟手閂燈 , 上次Mon 姨佢地入嚟食飯時又係咁 , Vicky 去去吓廁所 , 老豆一句唔該就閂燈 , 攪到Vicky 喺入面慘叫 , 哈哈 ~ 今晚 , Auntie 重大獲 , 因為我地同媽咪喺房試件雪褸 , 都冇為意d 咩 , 老豆一行出去 , 又好順手閂人地燈同熱水爐 , 最慘係Auntie 唔知咩事 , 重以為係d 熱水冇晒 , 所以照沖 , 死啦 ! 呢幾日得果幾度 , d 水就算洗手都涷到阿媽都唔認得啦 ! 重講要個老人家沖涼 , 到我地發現時 , Auntie Lee 已經沖完喇 !

唉 ~ 估唔倒 , 人地第一次作客 , 老豆就送咁大份禮比人地 , 都唔知好嬲定好笑呀 !